中環出更：彈古箏動作大鄒倫倫飛甩戒指
貪靚係女人嘅天性，特別係上台表演，梗要表現最靚一面。早前喺一個頒獎典禮見到古箏大師鄒倫倫（倫倫），佢獲頒藝術領袖人物獎，仲上台演奏多首樂曲以饗賓客，卓妮見佢十指空空，傾開先知有趣事。佢話有一次喺日本表演時，戒指唔小心飛甩出去觀眾席，自此佢彈古箏時佩戴乜嘢首飾就好講究，戒指可免則免喇！
倫倫笑笑口話彈琴時動作大、爆發力強，所以演奏時唔敢亂咁戴首飾，例如頸鏈唔可以太長，因為身體前後擺動，怕頸鏈太長會同古箏碰撞。雙手都係，有時彈到手指發熱兼出汗，若果感覺戒指好似想甩咁，就會令自己分心。嗰次直頭飛咗個戒指出去，真係搞笑，難得佢冇覺得可惜，仲笑稱邊個執到邊個好彩喎。
張鍾麗裳修復玉鐲有段古
講起演奏時整爛首飾，古董文物修復專家張鍾麗裳（Lisa）最近有朋友彈大提琴時，亦唔小心整爛咗夫家祖傳嘅清朝玉鐲，一下子爛成四件，朋友傷心到喊咗幾日，覺得對唔住老公。Lisa靈機一動，將四件碎玉重新設計，做成一件手環同埋三件吊墜，啱啱好畀朋友同埋佢三個女兒佩戴，朋友開心到不得了。Lisa笑稱，能夠保留先人留下嘅古董首飾，先係最有故事及意義嘅。
同場仲有金銀業貿易場理事長張德熙，事關佢係評審委員會主席。香港表廠商會名譽會長劉健華同中華總商會青委會常委沈慧林都喺度，佢哋都係做小眾市場嘅手錶，劉健華十幾年前開始專做軍用錶，賣得唔錯，所以即使現時市場難做，都唔太受影響。
卓妮