政情：陳勇炮轟民主黨勾結外國黑力量
所謂「清官難審家庭事」，屋企內部嘅事外人的確難以置喙，不過民主黨（白鴿黨）早前增設「國際事務委員會」，由該黨前主席劉慧卿（卿姐）出任該委員會主席，話希望外國可以了解多啲香港情況，令人質疑該黨想外國多啲干涉香港內部事務。新界社團聯會理事長陳勇尋日就開火炮轟該黨，話香港問題應該香港解決，唔使引入外力，形容該黨係「不肖子孫到外面勾結黑力量」。
陳話港人應維護香港權益，唔同意見可循本地政治發展同法律申訴處理，政治爭拗亦最好自己解決，咁先易達共識同符合各方利益。對於白鴿黨提倡引入外面力量，陳就形容係「不肖子孫唔喺屋入面開家庭會議解決問題，反而到外面勾結黑力量嚟恐嚇自己家人。」
劉慧卿：同國際聯繫冇問題
卿姐就反駁話香港係國際城市，同國際聯繫冇問題，亦都理所當然，唔認為政府會反對政黨加強國際聯繫，政府亦都會去外國講解本港情況。至於算唔算「唱衰香港」，佢就話同外國交流時只係會表達港人嘅關注，如營商環境、自由法治同一國兩制等。