政情：廖長江空降出任廉署委員會主席
政府尋日委任四個廉政公署諮詢委員會成員，其中廉署貪污問題諮詢委員會新主席就由身兼行政會議成員嘅商界立法會議員廖長江「空降」出任，以接替已經做咗六年嘅現任主席周松崗。廖嘅任期由明年一月一日起生效，為期兩年。而立法會議員陳克勤則獲續任為該委員會成員。廖同陳分別係立法會建制派正、副「班長」，估唔到喺廉署工作上又再合作。
周雯玲獲委任做新成員
政府尋日宣布，委任本身係私人執業大律師嘅廖做廉署貪污問題諮詢委員會新主席，及委任香港中華廠商聯合會轄下青年委員會名譽主席周雯玲為該委員會新成員，周亦都係特許金融分析師。
至於廉署審查貪污舉報諮詢委員會嘅新成員就有大律師公會前主席林定國、前立法會議員何敏嘉，以及規管強制性公積金中介人程序覆檢委員會及統計諮詢委員會嘅成員袁淑琴。林早前先獲政府委任做消費者委員會主席，依家又多一份公職，睇嚟都愈來愈忙喇。