政情：委會主席位罕見推莊 邵家輝話做又唔做
過往建制同泛民為掌握喺議會嘅主導權，經常爭奪做立法會各委員會主席，不過尋日立法會就罕有地上演推莊一幕，其中建制派嘅批發及零售界議員邵家輝喺委員會選主席時話做又唔做，結果就由醫學界議員陳沛然（Pierre）自動當選。
陳恒鑌請邵食檸檬
《（私營醫療機構條例）（為施行第135（1）（a）條指明日期）公告》及《（私營醫療機構條例）（為施行第136（1）（a）條指明日期）公告》小組委員會尋日首次開會。泛民議員郭家麒率先提名Pierre任主席，點知冇人和議，邵就立即提名議員陳恒鑌（Ben），點知對方就話唔做，直接請邵「食檸檬」。邵惟有問可否提名自己做主席，但當得知可以後，邵又反口連叫四聲「唔好」，再重複四次話︰「陳沛然（做主席）啦」，令本身無乜人氣嘅會議室傳出笑聲，而Pierre就係咁喺冇對手下自動當選主席。
邵事後話自己冇時間同能耐做主席，所以一心諗住Ben做主席。而Ben就話佢本身已經係有關法案委員會主席，唔得閒再做呢個小組委員會主席喇。