中環出更：陳茂波等七高官齊放聖誕假 政府半真空
律政司司長鄭若驊上周決定唔檢控前特首梁振英UGL案，仲放假十二日避風頭，拒公開交代背後法律理據，被社會各界鬧爆。原來連同鄭在內，合共有七名高官於聖誕節期間放假，最新一人係暗示明年財政盈餘大減嘅財政司司長陳茂波，佢將由平安夜（24日）開始放假九日，橫跨聖誕及元旦，直至下月二日先復工。話時話，政府最高層半真空狀態，萬一呢段時間有乜突發大事件，署任官員又唔醒醒定定嘅話，港人真係只可以自求多福喇。
政府三司十三局共十六名高官，於聖誕期間共有七人放假。政府尋日刊憲宣布陳茂波、食物及衞生局局長陳肇始，及民政事務局局長劉江華於下周放假。而陳茂波放假期間，財經事務及庫務局局長劉怡翔就會署任司長職務。
問責局長方面，劉江華將放假十一日，由平安夜開始至下月四日先復工，而陳肇始尋日開始休假，直至本月廿九日復工。
黃錦星元旦復工
而翻查早前憲報顯示，發展局局長黃偉綸及保安局局長李家超亦正在休假，而環境局局長黃錦星就會於平安夜開始休假，並於元旦日復工。
卓妮