港珠澳大橋通車後，旅客逼爆東涌，居民叫苦連天，外界炮轟政府冇做好旅客分流嘅措施，有立法會議員尋日就要求商務及經濟發展局副局長陳百里為失誤向東涌居民道歉，但佢冇回應呢個要求，淨係承諾會做好啲。老實講，啲旅客已經逼爆埋一啲唔係旅遊景點嘅地區，例如土瓜灣同荃灣等，居民生活大受滋擾，根本就係當局處理不善，若果範圍繼續擴散，必定爆發民憤，到時咪話道歉，係要佢落台呀！
