政情：重建觀塘區 羅致光教睇風水
勞工及福利局局長羅致光出名IQ高，寫馬經、渡海泳樣樣皆能，估唔到佢連風水都識睇，仲話十幾年前曾經同今年啱啱過身嘅堪輿大師、編纂「通勝」嘅蔡伯勵一齊去睇樓。究竟係咩風水寶地可以吸引到兩位高人呢？咪就係「窮絕全港」嘅觀塘區囉！佢話○六年同蔡伯勵受市建局邀請，一齊去觀塘APM商場嘅頂樓俯瞰觀塘區，睇吓點樣重建啲風水先係至好喎。
自小識掌相 話風水好科學
羅致光雖然冇交代蔡伯勵點講觀塘區啲風水，但係就即場化身「羅居士」，話自小就識掌相、四十歲仲學埋《易經》，話連立法會前主席曾鈺成嘅長孫都係佢幫對方起名嘅，依家佢辦公室仲有個羅庚添！佢又用祠堂做例子，話個布局係包含「金木水火土」五行元素，例如祠堂前面通常有個水塘，陽光就代表金，而當陽光照到啲水就會散發負離子，咁就可以減少陽光對木建築嘅傷害，正好係「金生水」、「水生木」嘅道理。
現場記者就考吓羅居士，問好受爭議嘅觀塘海濱音樂噴泉係咪好聚財，佢就話聚唔聚財唔可以就咁解，但話風水其實好科學，例如陽光照到噴泉，啲水會釋放負離子，起碼令人覺舒服先。講到頭頭是道咁，唔識佢真係以為自己係廟街擺開檔啲相士，多過係一個政策局嘅高官？