政情：限制黃之鋒出境 電騙黨搵錯對象
騙徒假冒執法人員係常見嘅電騙手法，過往有唔少人因而蒙受金錢損失，而今次就輪到香港眾志秘書長黃之鋒遇到。
黃之鋒尋日喺社交網站分享，指晨早流流收到自稱執法部門嘅電話錄音，指佢已被限制出境，之後將佢接駁去講普通話嘅男士，對方又要求佢提供中文全名。
官司未完 護照被扣
之但係，佢就話本護照早喺上年十一月已經被扣起，而官司則預料去到明年四、五月先完結，期間都唔可以離港，反嘲騙徒明顯搵錯人呃咁話。
佢又將接聽嘅電話號碼公開，呼籲大家要提防電騙，尤其要提醒屋企長輩，因為段電話錄音幾可亂真喎。但有網民就話嗰個電話號碼可能被冒充嚟呃人，有機會屬於無辜市民，所以叫佢唔好公開囉！