政情：展覽27年懶更新 科學館殘舊累香港蒙羞

立法會民政事務委員會尋日開會，審議政府申請二千萬元畀科學館做五年更新展覽計劃，會上有多名議員發言，其中體育、演藝、文化及出版界議員馬逢國算係溫和派，只係話二十幾年都冇更新，覺得好不可思議，認為應該恒常約五年做一次，而議員何啟明就話早幾日陪囝囝去完，大嘆「我細個玩嗰啲，我個仔都仲玩緊啊」。

議員嘲似恐龍時代

資訊科技界莫乃光就毫不留情，話科學館應該叫歷史博物館，啲展品好舊，唔應該叫學生去睇，費事佢哋將來對科學冇興趣，兼且以為科學「就係咁」。佢仲話政府三年畀一千億元搞創科，民政局諗住二千萬更新展覽就算？擺明係懶得做，就算攞兩億元都冇問題，拆咗成幢再起都得，覺得依家個館好羞家。

議員鄺俊宇就寸爆當局，話科學館好特別，時間停頓咗喺九十年代，磁電廊仲介紹緊視像通話科技。佢又話食品科學廳仲尷尬，撳吓個掣，啲食物就着燈，滿足大家撳掣同睇着燈嘅欲望，認為個館係展覽緊九十年代點睇未來科技，係恐龍時代文物，旅客睇到都想喊，連長者都嫌磁電廊過時，呢個係災難級問題啊！

陳積志拒休館翻新

話雖如此，鄺俊宇話重溫完都覺得開心嘅，九十年代嘅感覺返晒嚟。康樂及文化事務署助理署長（文博）陳承緯好似執到寶咁，即刻回應話「參觀令你開心，某程度都達到功能」。聽到委員會主席郭偉強打個突，叫署長如果冇嘢就唔好答嘞。民政事務局副局長陳積志就錄音機上身，話科學館舊年錄得超過二百萬人次入場，好有吸引力，亦因為咁唔可以休館做大翻新，希望議員明白喎。

班議員鬧得咁甘，都係因為知道科學館有吸引力，但都要與時並進o架，所以成日話議員阻政府攞錢，今次班議員就想政府攞多啲，都只係想做好件事，費事最後出醜國際啫！