中環出更：屋署抽葉劉水 跟風講滲漏

話說近日有網民留意到，立法會議員葉劉淑儀懸掛一條粉紅色嘅橫額，內容有關樓宇滲漏，上面仲有一滴粉紅色水滴，令到網民無限聯想，以為講場係同尿滲、女性經期等有關。

上載紅水滴相 宣揚樓宇保養

而屋宇署今次緊貼網上潮流，喺Facebook上載一張以粉紅色為底嘅相片，當中配以「滲漏 No More！」嘅字句，隔籬更加上紅色水滴，貼文更有hashtag「樓宇唔保好易老」、「樓宇滲漏講座」等，最抵死嘅係一個hashtag就係改編尿滲廣告對白做「點驗都無顧忌啦」。

不過，該貼文其實係想帶出樓宇要Keep Fit保養，先可以住得安心嘅訊息，並非純粹為抽水，但一眾網民見到就已經聯想到葉劉，紛紛留言標註佢，驚死葉劉睇唔到咁。

另外，葉劉都喺橫額被笑後認衰，但係為過咗限期先申請加入跟進不適切住屋問題嘅政策事宜小組委員一事。佢早喺今個星期一去信主席鄭泳舜要求加入，認衰指自己一時疏忽，希望委員可以接納申請咁話。

卓妮