高鐵同港珠澳大橋開通後，口岸附近嘅地區都被訪港旅客塞爆，財政司司長陳茂波（波叔）尋日喺網誌度話，今年全年嘅旅客量肯定超過六千萬人次，打破歷來最高紀錄。唔知佢係咪畀個數字沖昏咗頭，話未來可以推出「郵輪+高鐵遊」、「郵輪+大橋遊」等「一程多站」行程喎。之不過，眾所周知郵輪碼頭嘅交通配套不善，每次有郵輪靠岸就上演一次遊客呆等的士、巴士嘅醜劇。旅遊事務專員黃智祖仲未瞓醒，波叔咁做係咪靠害吖？
