食物及衞生局局長陳肇始近排真係頭頭碰着黑，先有申訴專員公署日前嘅報告批評中藥條例監管不力，尋日出席工聯會工人醫療所成立社區藥房開幕禮，致詞時仲發生意外添！話說佢致詞期間，個咪架懷疑扭唔實，突然極速下降，支咪向上彈起，陳當堂嚇到花容失色（圓圖），一度想整番高個咪架，但又整唔到。後來工作人員幫佢整番好個咪後，佢才繼續講嘢。其實嚇親唔緊要，遇啱個場地係喺醫療所，有齊中西醫，不如搵個醫生把吓脈、定吓驚？
