因宣誓風波引致嘅議員資格覆核案，目前只有社民連梁國雄嘅案件仍在進行中，其他議席都已完成補選，至於佔中九子案亦已完成結案陳詞，料於明年四月裁決。當所有事都塵埃落定之際，為上述案件被告籌訟費嘅守護公義基金，其信託人鄭宇碩日前以健康為理由提出請辭，同時辭去華人民主書院董事。
華人民主書院發聲明指，鄭宇碩以健康原因辭去董事，感謝其多年來嘅付出。近七十歲嘅鄭宇碩一手創立書院、基金及民主動力，早幾年已將民主動力交畀其他人，加上今次辭退兩個職務，可謂真正退出台前。不過唔知佢嘅健康有咩問題呢？
鄭接受傳媒查詢時就話唔方便透露身體狀況，已經搵緊接班人搞基金，但要等對方答應先可以公布。佢退休後會抽多啲時間陪屋企人，做自己想做嘅事，或者考慮出書喎。