政情：榕樹頭節扮王后 Ann姐博留任九西
講起油麻地榕樹頭，相信唔少老一輩嘅香港人都會記得，當年平民夜總會歌舞昇平嘅日子，不過尋日榕樹頭下卻隱現另類角力賽。話說今年兩場立法會九龍西補選圓滿結束，民建聯鄭泳舜及認為可被稱作建制派嘅陳凱欣進身議會後，流言四起，聲稱民建聯九龍西議員蔣麗芸（Ann姐）或會被勸退。不過，尋日一年一度嘅九西活動「油麻地榕樹頭節」，Ann姐連續四年出席，其餘九西議員就唔見影，唔通Ann姐瞓身做嘢博表現，希望扭轉局勢？
點名劉江華做嘢 倡納入非遺
油麻地街坊福利事務促進會自四年前就開始舉辦「油麻地榕樹頭節」，並由油尖旺區議員、民建聯油尖旺支部主席楊子熙主力籌辦，絕對係區內年度盛事，唔少街坊踴躍參與活動，以推廣油麻地歷史文化。每年出席嘉賓人數多不勝數，上至局長下至街坊會會長，可以話係區內舉足輕重嘅活動之一，舊年仲未做立法會議員嘅鄭泳舜都有出席，兼落場參加木頭車競技賽添。
大會每年都會邀請嘉賓一齊以奇裝打扮出席活動，更貼心備妥各款服飾喺裝身區任君選擇。尋日Ann姐就揀咗一件歐洲貴族禮服，成個王后咁樣，已經壓到場喇，到佢講嘢時更加毫不留情，點名要求民政事務局局長兼黨友劉江華做嘢。
Ann姐話，劉江華早幾日請飲奶茶、食蛋撻，話呢啲係佢成功申請做非物質文化遺產（非遺）嘅嘢，諗諗吓，榕樹頭文化都應該申請埋非遺喎。佢仲話，應該將公園恢復舊貌，畀人喺樹下講古、唱南音同睇相，佢每次嚟到都會覺得每棵榕樹都講緊古仔，見證住油麻地過去百幾年嘅歷史，彷彿聽到有人唱「冷得我騰騰震」，希望可以延續到呢個文化。
剩兩年換屆 建制派議員角力
無可否認，九西建制派有人滿之患，但距離換屆仍有約兩年時間，不論鄭泳舜或陳凱欣，其立法會資歷尚淺係不爭事實。Ann姐今鋪出盡牙力都叫劉江華做嘢，仲「盛裝」打扮出席，似係博留任，更似係用行動證明其中流砥柱身份。大家即管睇吓下一屆誰領風騷喇！