中環出更：翻新變翻身 容海恩認橫額寫錯
立法會議員同區議員嘅橫額同單張，不時都被人發現寫錯字。本報接獲讀者報料，指立法會議員容海恩（Eunice）一幅有關「促請政府加快北區醫院擴建及翻身（新）工程」嘅橫額，將「翻新」寫錯咗做「翻身」。不過Eunice回覆查詢時直認係自己寫錯，呢個態度同好多同樣出錯嘅議員好唔同，真係抵讚。
通常橫額被發現出錯時，好多議員都會將個責任賴晒落助理或辦事處職員度，而Eunice就做咗個良好示範，坦率認錯，其他議員真係要學吓嘞！
笑稱更多人關注北區醫院工程
其實寫錯字都好少事啫，Eunice依家大肚咁多嘢忙，寫錯一個字，都值得體諒嘅。話時話，佢就嚟做媽媽，都話身教勝於言教，相信佢日後都會係一個稱職嘅媽媽。
講番今次寫錯字，Eunice笑稱可以令多啲人關注北區醫院都係好事，佢話北區醫院又舊又老化，雖然遲啲會增加兩個病房，但都唔夠應付人口增長同老化，加上東北發展令區內有新人口增長，真係有需要加快擴建同翻新咁話喎。
卓妮