中環出更：張亮望體諒封路
近年香港人追求健康，大大小小嘅長跑比賽漸成受歡迎嘅運動項目。全城街馬創辦人張亮都好鍾意長跑，曾經參加過多個外國賽事，連戈壁沙漠都征服埋。佢笑笑口話，有個夢想去秘魯馬丘比丘跑步，就算唔跑去行吓都好，不過暫時就未有計劃再出外征戰，因為最難係要獲得太太批准喎！
卓妮早前喺沙田馬場見到唔少長跑發燒友，好似有香港青年工業家協會執行委員李文恩，同其胞弟、前仁濟醫院董事局主席李文斌。
婚後怕肥 李文恩積極練跑
籌備多次街跑活動嘅張亮就話，長跑比賽背後要經過唔少政府部門同意，所以每年情況未必一樣，而籌備最大阻力可能來自市民，因為比賽要封路令市民不便，希望有日能令市民明白比賽為慈善同歡樂而接受到。
李文恩今年四月亦有參加本地長跑比賽，但當日天氣唔好影響發揮，罕有地要行吓跑吓咁完成比賽。雖然今次發揮麻麻，但佢已經打算明年首次挑戰全馬，依家已經開始準備添，例如跑斜路。佢中學年代已經係長跑隊成員，不過之後停咗一段長時間，直至婚後怕肥先再跑番。
轉頭見到前醫院管理局主席梁智鴻同太太梁馮令儀及兒子梁捷榮現身。從事酒店業嘅梁捷榮因工作關係而周圍飛，佢就大讚爸爸地理知識了得，事關自己經常去唔同地方公幹而經常同爸爸交代行蹤囉。梁捷榮更話，工作最難係要不斷諗新概念去興建新酒店，所以每個項目都有難度，印象最深刻就係喺中東阿曼，一個海拔二千米高嘅位置起酒店喇。
卓妮