考吓大家，壹淫媒同舊式火車之間有咩共通點？答案就係「勁窮勁窮勁窮」嘞。壹淫媒呢排衰開有條路，頭頭碰着黑，淪落到賣產救亡都止唔到血唔在講，股價仲跌到阿媽都唔認得。正所謂近朱者赤，近墨者黑，近淫者瓜，漢奸黎自己黑氣纏身，邊個揩埋去都畀佢累埋一份，衰埋一堆，真係唔到你唔信邪吖！
話說壹淫媒股價前日跌完，尋日又繼續食瀉藥，距離仙股只有一步之遙。鬼咩，壹淫媒捧場客買少見少，銷量同廣告收入跌跌不休，同國泰航空一樣愈做愈燶，就算漢奸黎想做契弟賤賣業務，都未必搵到人接火棒。家陣唯一令投資者感興趣嘅，可能得番集團旗下物業，問題係壹淫媒債台高築，好似啱啱賣出嘅台灣總部咁，套現四億幾但要還一大筆錢畀債主，真正落袋嘅有限，財金界人士估計頂多可以吊多兩三個月鹽水，奉勸小股民咪貪平撈底。咁又係呀，舊年《壹週刊》傳出賣盤，股價一度上揚，如果當時有人以為入貨有得分，家陣相信喊得一句句。
講真，壹淫媒都算邪門，Take親都衰硬，股民固然要識趨吉避凶，旨意佢保駕嘅政棍，一樣冇運行。啱啱過去嘅立法會九龍西補選，淫媒出盡吃奶之力催谷李呃人，漢奸黎更赤膊上陣拍片力撐，結果咪又係連底褲都輸埋。仲有年頭出戰九西補選嘅姚松炎、舊年係威係勢角逐特首嘅鬍鬚曾，統統都係爛果報同漢奸黎死亡之吻嘅最佳註腳。
最好笑嘅係，李呃人敗選後一味姓賴，一時話人鎅票，一時話天氣差影響投票率，一時話被抹黑，再唔係就話被「國家級打壓」，總之就藉口多多。其實真相一字咁淺，市民眼睛雪亮，一早睇穿李呃人係漢奸黎走狗嘅事實，家陣李呃人仲好似慌死人唔記得佢單黑金「袋住先」醜聞咁，連瓜田李下避嫌都費事，唔輸就有鬼。
即係咁，無良政棍助紂為虐，被選民唾棄自取其辱，與人無尤，可憐嗰班睇爛果報、飲毒果汁大嘅年輕人，佢哋被洗腦鼓動走咗去「違法達義」，紛紛淪為被告、階下囚，學業、前途一朝盡毀，「最精彩」嘅人生喺大牢裏度過。呢個故事教訓大家，信毒果一成，雙目足以失明，話爛果報同毒品一樣，不可一，不可再，就係咁解。
始終都係呢句，出得嚟行，預咗要還，唔理港府、律政司點樣充當保護傘，將漢奸黎同壹淫媒從頭到腳罩到嚴嚴實實，始終都挽回唔到佢哋嘅可悲命運。至於小股民，手頭真係有多個閒錢嘅，與其揼落鹹水海，不如買定花生外加元寶蠟燭紙船，送淫媒上路仲過癮喇！