政情：公民講場：項目辦冇鬼用黃偉綸仲諗擴充

話說發展局建議將項目成本管理辦事處升格，並擴充成為項目策略及管控辦事處，局方仲自吹自擂話成立咗兩年，做咗唔少嘢，但就畀班議員狂插，話基建工程嚴重超支嘅醜聞不絕，質疑情況並冇改善。老實講，市民有眼睇o架，淨係沙中線醜聞鑊鑊新鮮鑊鑊甘就火到嚟埋，若果呢個辦事處連呢啲工程都監管唔到嘅，又叫唔停大白象，只睇埋啲細眉細眼嘅數，根本冇作用，發展局局長黃偉綸仲想將辦事處升格同擴充，咪等於嘥公帑。