政情：八網難逃：握手太多過勞 EQ手腕韌帶發炎
立法會議員葛珮帆（EQ）尋日喺Facebook上載咗幾幅相，相中見到佢其中一隻手有疑似中醫拔罐嘅紅印，另一幅相就見到佢右手手腕戴咗個類似黑色護腕，仲叫大家對佢對手「溫柔啲啦」，到底佢對手做咗啲咩咁操勞呢？
笑言係「議員職業病」
原來EQ話自己近日握手握得多，支持者又熱情，周不時大大力拉扯，早前竟然扭傷咗手腕，韌帶發炎，依家一用力、一拉就痛，已經針灸咗兩次都未好。本來已有傷患，佢話再加上呢幾日幫忙選戰又握，黨有晚會活動又握，握咗好多好多手，搞到隻手傷上加傷。
佢仲笑言呢個係「握手後遺症」，又話呢個係議員職業病，不過佢就呼籲支持者「其實握手唔使咁大力扯」，仲叫大家溫柔啲對佢嘅手咁話。