政情：馮檢基反欽點：李卓人唔係同路人
立法會九龍西補選已經落幕，其中因不滿民主派欽點李卓人為民主派「Plan B」候選人，而決定參選嘅馮檢基尋日重申係支持初選機制，堅決反對欽點「Plan B」，強調喺呢個範疇上，自己同非建制派，包括李卓人都唔係同路人。佢又話二人主打唔同民生議題，例如李主打勞工，佢就主打屋邨、社區，二人只有喺爭取民主、同政府「拗手瓜」時先可以稱為同路人。
被問及假若二○二○年立法會換屆選舉時，民主派依然唔採用初選機制決定候選人，佢會唔會再度參選時，佢話香港係國際都市、文明社會，無論係建制派或非建制派都唔應該欽點候選人，強調自己唔排除以任何方式反對不民主，當中包括參選或唔參選，若參選對反對不民主有作用，如引起討論、刺激社會反省欽點機制就會參選，否則就唔參選。
認得票較預期少 唔認（界刂）票
佢亦承認補選只攞到一萬二千多票較預期少，但堅持否認（界刂）票，又強調有民調指佢喺建制派同非建制派之間各取約百分之十嘅選票，認為係一個否定佢（界刂）票嘅客觀證明。對於補選得票會唔會作為考慮係咪參選下屆立法會選舉嘅理據之一，佢就話比例代表制同單議席單票制完全唔同，依家難以作定論。