政情：卿姐出山選紀委 平黨亂劍指峯鴿？
民主黨（白鴿黨）近來鬧出唔少風波，包括該黨立法會議員許智峯（峯鴿）捲入搶行政主任手機案、新界東支部雙牌頭風波等，令到黨內立立亂。該黨將會喺下周日舉行換屆選舉，據了解多名元老退下火線，而曾一度公開鬧爆峯鴿行為過分嘅前主席劉慧卿（卿姐）就反潮流，向黨貢獻第一次，出山參選紀律委員會。莫非卿姐認真睇唔過眼，打算親自為黨除瘀血？
白鴿黨新一屆中央委員會及紀委會尋日傍晚截止遞交提名。有分析指，白鴿黨近嚟是非多，不時要出動紀委會審訊平亂，所以今次換屆選舉重點落喺紀委會成員身上。根據紀委會候選人名單，只有九人參選，當中五人係競逐連任，其餘四人就包括陳樹英、鄭則文、卿姐同埋現屆中委會委員何志偉，明顯係老鴿重出江湖，平亂之說不言而喻。卿姐回覆時笑稱「係黨友叫我選」，自己都唔知係點運作，以前做主席都無理過紀委會係點。至於會唔會有機會要處理峯鴿投訴？卿姐斬釘截鐵話唔知，首先係唔知自己選唔選到，再加上紀委會就每個個案會選三人負責，未必一定係佢喎。
單仲偕復出選中委
中委會方面，主席胡志偉同副主席羅健熙競逐連任，而前一屆做過副主席嘅尹兆堅就翻兜再競逐副主席。然而有十名現任中委決定退下火線，包括張文光、何俊仁、楊森，以及盛傳將離黨嘅沙田區議員丁仕元等，而峯鴿就因為被凍結黨籍冇得參選。參選名單中亦有唔少「乳鴿」，包括啱啱當選民主青年副主席嘅黃正峰同常委朱子洛，仲有胡志偉揸莊嘅九東支部成員，如梁翊婷、沈運華、陳英傑同胡志健等。喺元老級退下嚟同時，唔止卿姐反潮流，就連單仲偕都復出選中委。
根據目前名單，由於兩個委員會嘅參選人數都較法定人數為少，預料全部人都可以喺毫無競爭下，得到足夠信任票順利當選。有黨中人表示，今次係近十年嚟首次毫無競爭選舉，大家都唔知發生乜嘢事，竟然冇人想做，形容今次係「好特別」。不過咁多老鴿復出，似係衰落嘅徵兆，即管睇吓來屆班老鴿又有乜嘢招可以解困？