中環出更：陳凱欣議會初登場 首揀鄭松泰合作
候任立法會議員陳凱欣將於今日宣誓就任，不過已經率先與其他立法會議員有所合作，而對象竟然唔係選舉時為佢助選嘅建制派，而係熱血公民嘅鄭松泰。
座位將與鄭為鄰
陳凱欣尋日朝早綵排宣誓時就透露，座位同辦公室仍未有定案，綵排時就坐住青年新政梁頌恆嘅原位，左側為鄭松泰。據了解，陳凱欣已同鄭松泰取得共識會互換位置，令佢可以坐喺鄭松泰同馬逢國之間，前面則為議員謝偉銓，使呢位議會新丁可以同建制派有所照應。
至於用喺召開財務委員會、內務委員會等會議嘅會議室一，據悉陳凱欣就要同建制派分開，與泛民陣營有一條走廊之隔，而鄰座為人民力量陳志全。不過，佢前面仲有議員鄭泳舜同謝偉銓，所以都唔算孤單。
喺辦公室方面，據聞陳凱欣屬意六一八室，同鄭泳舜為鄰，但由於立法會秘書處正用緊六一八室，需要約半個月時間清場，呢段時間陳凱欣會用住一○一九室，而上手用家就係社民連梁國雄，預料聖誕節就可以返回建制大本營。
卓妮