中環出更：青委三字頭玩電競 陳浩弘嘆比賽輸蝕
香港中華廠商聯合會（廠商會）早前搞工商體育邀請賽，畀各大商會以競技聯誼，又可以活動吓出身汗。近年電競地位開始提升，唔少名人都話廠商會下次可以搞埋電競，而香港餐飲聯業協會（餐飲聯）青委會主席陳浩弘透露，餐飲聯青委會已成立咗電競隊可以隨時上陣。
今年體育邀請賽分三日去比併多項球類活動，而比賽後亦有頒獎禮暨晚宴，畀機會大家聚首一堂，而陳浩弘、香港電腦商會前主席余華強、互聯網專業協會副會長陳家豪等都有出席，主人家廠商會都非常齊人，好似有廠商會青委會副主席黃浩鈞、王詩雅同常務會董李慧芬等。
同競技共通處 均講策略反應
陳浩弘話餐飲聯青委會嘅電競隊成日見面嘅，睇嚟操練十足，但佢就大嘆電競講求靈敏，職員生涯比傳統運動員更短，佢哋班青委大部分都三字頭，同電競選手比賽就有所輸蝕。
打開網球嘅余華強就話電競同其他競技項目好似大纜都扯唔埋，但諗真啲都有唔少共通之處，好似都要講求策略同反應，可以話係鬥智鬥力，而陳家豪更話電競開始講求肌肉運用，好似虛擬實境技術消耗多咗能量，直言列入亞運示範項目係有原因囉！
話說今次足球比賽四強賽事由廠商會大戰餐飲聯，因黃浩鈞同時都係餐飲聯青委會副主席，導致身份衝突，所以影大合照算嘞！佢話喺加拿大讀書有機會打入省隊，但因為踢波搞到傷患纏身，再加上當年球隊因經費不足，無法遠赴蘇格蘭參加好多球探嘅比賽，大嘆錯過畀人相中踢英超嘅機會。
卓妮