利益申報被喻為陽光法案，係預防以權謀私同埋腐敗嘅最佳方法，可惜吖，香港話就話係法治廉潔之區，實情係申報機制天殘地缺，上自特首下至區議員，好多都收收埋埋，唔怪得黑箱作業、私相授受嘅醜聞層出不窮喇！
審計署同政府帳目委員會都發表過報告，批評全港十八區區議會申報利益程序混亂，《區議會常規》冇界定乜嘢係「其他可供申報的利益」，容易出現議員自把自為、自己批自己嘅情況。嗱，有錯就認，南區區議會計劃收緊議員利益申報制度，要求議員喺「個人利益登記表格」度，連冇實務性質嘅職銜都要申報，呢啲咪亡羊補牢咯。
弊就弊在目前全港得五、六個區議會肯從善如流，其他嘅就好似被點咗穴咁，踢極都唔郁。最離譜嘅係，各區區議會自行修例，各行其是，幾乎搞到「一港十八制」咁滯。點解各區冇一個統一嘅申報制度呢？一日最衰都係港府，對於邊啲利益要申報邊啲唔使，政府到家陣都冇清晰指引，踢番個波畀議員自行判斷，唔亂就奇。試過喇，有議員申報有利益衝突，但照樣可以參與審批撥款等重大事宜，你話申報制度唔係廢嘅都冇人信。
講真，區議會雖然唔似得立法會咁大權，郁吓審批涉資百億千億嘅工程，但係唔少地區工程都係由區議會投票表決，近年港府更推出一億元社區重點項目計劃，利益申報絕對唔可以馬虎。當港官同立法會議員假假哋都要按指引申報利益，區議會卻恍如國中之國，法外之地，有啲區議會嘅利益申報表格得兩張紙咁大把，議員想話申報詳細啲都唔得，可想而知制度有幾求其。政府容忍區議會申報制度百孔千瘡，即係設下陷阱，引人犯罪啫。
咁當然喇，完善申報制度係一回事，能否落實又係另一回事，高官同議員漏報利益嘅例子多到數唔晒，前特首曾蔭權爵士因此坐監，前政務司司長肥龍亦淪為階下囚。仲有嗰位以政治變色龍著稱、家陣成為行政會議成員嘅前立法會議員，本身搞法律出身，結果咪一樣扮失憶，申報不盡不實。可見制度係死嘅，若有人刻意隱瞞利益，申報機制都係形同虛設。
講到完善申報制度，冇法子唔提防賄條例。自從曾蔭權爵士一失足成千古恨，市民先發現現行防賄條例不適用於特首。令人無法接受嘅係，無論過氣特首梁振英定現任特首林鄭，口講支持修改條例，實際上毫無動作，你話嘞，特首帶頭「無王管」，單靠一個申報機制點可能防貪反腐吖！廉潔香港淪腐敗香港，家陣知點解喇！