港珠澳大橋自上月底開通以來甩漏不斷，先係俗稱「金巴」嘅穿梭巴士唔夠分流乘客，無論買飛、等車都出現驚人嘅人龍。尋日仲出現交通錯配，去珠海嘅就人少車多，去澳門就掉番轉，搞到啲乘客一肚氣。不過最無稽係連日來大批內地半自由行嘅「體驗團」，湧入鄰近嘅東涌去搭巴士，令居民十分困擾，連離島區議員周浩鼎都鬧爆，緊急約見政府部門處理。大橋明明係一條交通要道，依家無啦啦變成旅遊景點，仲要搞到市民怨聲載道，睇嚟政府真係要搞搞佢喇！
