政情：剪鋼筋醜聞未息 禮頓執冧樹獲嘉許
近日捲入沙中線剪筋醜聞、備受爭議嘅禮頓建築(亞洲)有限公司，竟然喺民政事務局局長嘉許計劃中獲獎！喺剪筋事件中多次被提及的禮頓總經理Karl Speed代表，尋日出席頒獎典禮並從民政事務局局長劉江華手中接過獎狀，之後仲同一眾同事喺台上合照。
究竟發生咩事？原來係超強颱風「山竹」襲港之後，包括禮頓在內嘅廿幾間建築公司及地區小型工程合約承辦商，響應政府嘅呼籲，一呼百應咁幫手清理大批塌樹同埋垃圾。劉江華致詞時話，建築署副署長何永賢協助聯繫當中十間公司，短時間內調動大型機器及技術工人，義務協助、清除及移走大量塌樹及大型廢物，讓交通回復暢通，所以佢代表政府特別感謝建築公司及合約承辦商。而尋日共有廿四間公司及一百八十人獲獎。
劉江華致詞 女人變先生
除此之外，劉江華致詞時將女人講咗做男人，佢致詞時提到建築署副署長何永賢「先生」，但係翻查資料，何永賢其實係女士。