中環出更：天降橫財 黃定光中六合彩 機率百分百
橫財運唔能夠強求，降臨時亦都走唔甩。早前中華出入口商會（中出）舉辦進出口企業大獎頒獎典禮，進出口界立法會議員黃定光、中出副會長許華傑（Michael）都有到場。講起彩數話題，象哥自爆買六合彩嘅中獎機率達百分之一百，皆因佢只買過一次，一擊即中，自此「割禾青」未有再買，所以保持不敗紀錄喎！
象哥「最初亦係最後」買六合彩嘅經歷發生喺三十幾年前，當時佢返屋企搭電梯時覺得踩到啲嘢，彎身一睇竟然係一張廿蚊紙，佢當執到寶咁放入袋。第二日佢去餐廳食飯，咁啱隔籬就係投注站，佢突然有股衝動想買六合彩，於是嗰廿蚊就令佢中咗六千蚊。
許華傑羨慕 玩魚蝦蟹輸晒利是錢
象哥形容當時六千蚊都係筆大數目，咁啱佢嘅女兒出世，就用呢筆橫財去買隻金羊送畀個女喇。象哥嘅好運唔止主動嚟，仲要避都避唔到。佢話有次入馬場，陪朋友落注，點知睇住第三場但買錯第四場，但結果都贏馬收錢。許華傑聽完就相當羨慕，但係佢係黑仔王，去親馬場都係鋪草皮，就算農曆新年同屋企人玩「魚蝦蟹」，做莊嘅佢都會輸晒啲利是錢，難怪佢苦笑話無橫財命啦。
經營凍肉貿易嘅中出副會長歐陽永基就話，即使平日無乜運，都要做定準備迎接機會。好似佢早前喺內地經營海外進口肉類嘅生意遇上樽頸，但內地突然爆出非洲豬瘟，對進口豬肉需求急增，而佢一直有入定足夠存貨，最終把握時機賺咗一筆。
同場仲有國貨公司後人余偉傑（Andrew）同未婚妻Emma，佢哋明年一月將拉埋天窗。Emma話平時買六合彩只會中兩、三個號碼，笑言所有運氣都用晒喺「認識Andrew」呢件事上，真係甜到漏。
卓妮