成日話「屁股決定腦袋」，睇吓班港產官僚就知，在位時渾渾噩噩，退休後眉精眼企，表現判若兩人。早排有位負責運輸及房屋政策嘅前高官鬧爆港府同港鐵簽訂嘅基建合同「蝕章」，講到好似自己冇份咁款，家陣又輪到前私隱專員蔣任宏出嚟指點江山，真係唔到你唔服。
國泰航空九百四十萬名客戶個人資料外洩，隱瞞逾半年至死死氣公布，全城鬧爆，現任私隱專員黃繼兒束手無策，連日來避得就避，反而蔣前專員主動出擊，狠批國泰冇證據顯示外洩資料曾被濫用嘅辯解「冇意義」；又暗寸公署向國泰開展「循規審查」係無牙老虎，話公署檢視並提出改善建議後就會銷案，毋須裁決係咪違規之餘，亦唔使向公眾交代，毫無阻嚇力可言。
呢啲咪巧言令色囉！因航死撐「冇證據」客戶私隱被濫用，點止「冇意義」，直頭「無恥」。不妨打個譬喻，賊人入屋行劫，斷估唔會入寶山空手回，淨係寫張「到此一遊」字條，證明自己藝高人膽大然後鳴金收兵；而按照因航嘅邏輯，戶主珠寶首飾失竊，莫非一日未親眼睇住賊人戴住去ball，一日都唔叫有「證據」顯示財物被「濫用」？
咁當然喇，當你伸出一隻手指指摘其他人，其實正在用四隻手指指住自己。蔣前專員任內表現有口皆悲，笑話多多，佢自己都識話喇，香港嘅私隱條例大幅落後發達社會。呢個係歷任專員嘅「共業」，冇人可以置身事外，就講歐盟一早規定企業洩漏私隱需七十二小時內公布，但香港就冇呢項規定，唔通蔣前專員冇責任？
難為佢老哥仲好意思摷番二○一○年八達通出賣百幾萬用戶個人資料單畸士出嚟講，話事件再次喚起大家對私隱保障嘅關注，懶係義正詞嚴咁款，實情係佢老哥當年親手放生八達通，淨係要求對方簽署承諾書，連發出執行通知甚至譴責都慳番，所以話，講到「無牙老虎」咯喎，兩任專員彼此都係一擔擔，烏鴉唔好笑豬黑。
講到呢度，大家終於知道點解國泰到依家仲係滋油淡定，一派死豬不怕開水嘅架勢，皆因香港保障私隱嘅條例廢，保障私隱嘅衙門更廢，莫講話私隱署一個小小衙門，成個政府整唔見全港幾百萬選民個人資料，到頭來一樣冇人要問責，縱容成咁，因航唔有恃無恐至奇。國泰當港府冇到，反而一聽到歐盟可能開出幾十億元罰單，英國律師行協助受影響乘客集體訴訟，當堂嚇到鼻哥窿冇肉，國泰「香港人嘅航空公司」個朵果然名不虛傳，只不過前面應該加上「專恰」兩個字咁解啫！