港府搞環保和清潔運動，咁多年嚟只贏得「失敗」兩字。清潔運動向來予人雷聲大雨點小的感覺，口號多多，強調全城清潔，高官落區揸住掃把攞住地拖，結果係油尖旺、觀塘、深水埗、九龍城、灣仔等食肆林立的地方，後巷依然污糟邋遢，鼠患處處。至於搞環保，環境局局長黃錦星除了徵費還是徵費，膠袋徵費，「四電一腦」徵費，而擾攘咗十幾年嘅都市固體廢物收費條例草案終於可在本月中提交立法會審議喇，星哥預料最快二○二○年底落實收費喎！
個計劃如果落實，市民必須購買政府指定嘅垃圾袋棄置垃圾，三人家庭每月約需支付垃圾費三十三至五十一元。政府廣設銷售網絡，超市、便利店、郵局、油站等約四千個銷售點都可以買到指定垃圾袋，而鄉郊地區和垃圾收集站附近則設置自動售賣機。你睇，政府為咗垃圾收費，幾咁細心體貼！老朽相信，為咗成功落實垃圾收費，如果你話自己行動不便，睇怕政府都會用速遞服務送垃圾袋到你家！
講真，政府如果用「搞環保必徵費」呢種「務實」精神搞醫療、搞安老院舍，相信公立醫院急症室就唔會咁慘情，例如流感高峰期，排急症往往等大半天都未有得睇，而政府資助嘅安老院舍，不少老人含恨而終都未輪到！
講番垃圾徵費呢筆，有環保團體擔心配套少，加上政府專諗埋啲屎橋，從「四電一腦」搞到天怒人怨就知喇，家陣又話要改裝公共垃圾桶，以為桶口細咗就會令市民減少棄置垃圾，但正如有論者指出，市民會索性把垃圾丟在垃圾桶旁，這絕對合乎人性貪方便嘅推測。其實，搞環保一味靠打劫市民荷包是否唯一出路？垃圾收費政府帶頭製造每日數以百萬計嘅收費垃圾袋，何以對塑膠產品的禁用完全忽視？政府搞環保本末倒置，收費擾民添煩，垃圾分類、源頭減廢都未做好，又跟唔上國際趨勢，這是搞邊科環保？