政情：鄺俊宇想開咪 自嘲把聲哽耳
立法會議員鄺俊宇（Roy）百足咁多爪，為人熟悉嘅係愛情小說作家，但佢亦曾經係一位DJ（唱片騎師），但三至四年前已經告別開咪生涯。尋日佢出席一個與電台相關嘅活動時就話懷念開咪感覺，似乎心癢癢想出山。不過，佢就話同其他人一樣聽唔慣自己把聲，覺得「哽耳」，咁代表人類連自己都唔了解，先會認唔出自己把聲喎。
Roy話，當年做DJ時都仲未選到區議員，可以話DJ見證住佢參選區議會同立法會，所以就算現時唔會再開咪，但有時間都會返去幫手。佢更大讚開咪嘅世界好玩，又分享做電台最重要係引起共鳴，所以DJ要搵出屬於自己嘅聽眾。
曾任DJ 電台見證成長
唔少人話做DJ要有急才去執生，Roy呢位前DJ就唔敢話自己有急才，但會以搞笑手法令聽眾輕鬆。佢更回想廿年前喺被竇中偷聽電台嘅日子，因為父母唔畀佢咁夜瞓，自言電台見證佢長大，所以先會有莫名其妙嘅熱忱囉！