政情：馮興禮畀阿媽催生仔
勞工及福利局局長政治助理馮興禮（Henry）同太太今年七月喺英國拉埋天窗，聽聞Henry媽恨抱孫，近日大打開口牌，同Henry講「係時候要諗吓生B嘞！」都啱嘅，Henry已經三十一歲，開講有話，有仔趁嫩生嘛！
新一份施政報告建議將法定產假延長至十四周，女性公務員仲可以立即享有新假期。Henry雖然無法享受，但佢都要負責推動議員支持立法建議，佢就慨嘆媽媽近日有意無意開口提醒佢，要諗吓幾時生B喎。不過佢又笑住話，英國薩塞克斯公爵夫人梅根都係三十七歲先有喜，連媽媽都係咁上下年齡生佢，所以可以遲吓先喎。
笑指仔女無所謂
咁鍾意仔定女？Henry好機靈咁話「仔女都無所謂」，但就要諗吓邊個湊BB。佢直言，局方大推祖父母幫手湊孫，但現代嘅祖父母都好年輕，未必個個想湊，如果搵外傭又擔心BB會好似佢咁，因為言語不通，細細個唔太敢講嘢變得內向。