政情：邱誠武寫日記苦多樂少

喺依家呢個網絡年代，大家上網、玩手機嘅時間可能多過同人傾偈，寫日記呢種習慣應該愈來愈少人有喇。不過運輸及房屋局前局長邱誠武原來係真「文青」，到依家都仲會寫日記。日前見佢一個人喺中環一間走高檔路線嘅皮革文具店搜羅記事簿，不過行咗幾分鐘都揀唔啱，之後就走人去咗搭地鐵。睇嚟佢對記事簿都幾有要求噃。

邱日前喺中環一個商場現身，佢一行入商場就直去文具店，拎起本簿睇咗一陣，之後又睇文件夾，但最後都係冇「收穫」。上前同佢打招呼，佢就話因為記事簿用晒，所以想買本新嘅，用嚟記低日常事務。被問到有冇寫日記，佢就話中學時已開始寫喇，不過佢就冇翻睇過啲日記喎。

唔知佢寫日記係寫啲乜嘢多，會唔會寫同太太拍拖嘅嘢呢？佢就笑笑口話都有寫嘅，不過多數係寫平時啲唔係咁開心嘅嘢，至於開心嘢點解唔寫，佢就話︰「開心嘢擺喺心度得喇。」