政情：鋒雲接手監察西九小組成員等睇惡鬥
立法會監察西九文化區計劃推行情況聯合小組委員會（監察西九小組）再傳出換人安排，繼早前本報報道小組主席將由民建聯劉國勳換成身兼行政會議成員嘅林健鋒（Jeffrey）擔任，最新傳出由民主黨黃碧雲取代公民黨陳淑莊（Tanya）出任副主席。兩名傳聞中嘅正、副主席未上場，台下嘅小組成員預料兩人性格火爆，又同樣偶有甩轆，肯定爆出火花兼大派花生等睇戲。
泛民批林無管理文化經驗
Tanya接受查詢時，承認唔會角逐監察西九小組副主席一職，原因係佢有案在身。違法佔領行動（佔中）九子案中，Tanya被控「煽惑他人作出公眾妨擾」及「煽惑他人煽惑公眾妨擾」罪，並會於月內開審。據悉泛民主派中人考慮到Tanya或要坐監，所以新一屆立法會會期未有安排佢出任任何委員會嘅正、副主席，而接手其監察西九小組副主席一職嘅，將會係九龍西直選議員黃碧雲。
正、副主席潛在人選曝光，雙方陣營立刻評頭品足。泛民中人批評Jeffrey冇管理文化經驗，指佢同文化兩字最廣為人知嘅，係佢早年喺舊啟德機場出席「巨蛋音樂節」時逆線行車兼衝紅燈，當年已身兼行會成員嘅佢，最終要上庭兼被判危險駕駛罪成。
黃缺席首會議 靠盟友爭位
建制派人士就反駁，話西九文化區管理局董事局喺○八年成立時，Jeffrey係首屆董事局成員，反指黃正如外號「一舊雲」，投錯票、叫錯名、唔熟書、遲大到等甩轆嘢全部做齊，質疑佢係咪稱職。
Jeffrey就對係咪出任主席不作回應，但佢話綜觀多年來咁多個委員會，主席同副主席交流較少，爭拗機會仲少過同委員。黃承認有意爭取做監察西九小組副主席，但就指周二（6日）舉行嘅首次會議將會缺席，要由泛民盟友代為替佢爭位。不論兩人點講都好，觀乎Jeffrey同黃碧雲呢對正、副主席組合，小組內各陣營議員表示已準備好花生，等睇兩人爆火花同甩轆場面咁話。