中環出更：轉數快爆漏洞 張國鈞唔敢用
身兼行政會議成員嘅立法會議員張國鈞（Horace）係波牛，佢話每次踢波都要同朋友夾錢租場，但係身上未必有散紙，搞到成日要記住條數。早前金融管理局推出「轉數快」系統，佢仲諗住終於可以解決呢個問題，點知爆出保安漏洞。佢忍唔住批評「未整好就唔好急住推出」，因為事故損失嘅唔止係金錢，仲有市民嘅信心。
多名市民早前被人透過系統轉走戶口內嘅存款，事後發現係「轉數快」系統出現漏洞所致，用緊嘅市民好擔心下一個中招嘅係自己，未開始用嘅人就失晒信心，唔敢貿然去試，當中包括Horace。
為霸佔市場 過急推出
Horace話事發後問過銀行界朋友，對方指今次出事責任在電子錢包公司，原因佢哋為咗搶客霸佔市場，急到連雙重驗證嘅步驟都冇做，結果爆出今次漏洞。
點解明知電子錢包公司問題咁多都照合作，呢位銀行界人士就解釋話，電子錢包公司向銀行保證因技術漏洞而損失嘅金錢，公司會全數賠番畀銀行，即係銀行係唔會有金錢損失。Horace就提醒政府部門同銀行，唔好以為「轉數快」出事有電子錢包公司「包底」就得，因為市民見到咁多漏洞，就唔會有信心再用，要好長時間先可以建立番信心，好似佢自己咁，相信短期內都唔敢再試任何電子錢包喇。
卓妮