中環出更：小吉撐水墨畫動畫化吸引年輕人
近年世界各地都向「智慧城市」發展，高科技愈嚟愈受重視，連藝術都不能避免。藝育菁英基金會舉辦嘅「全球水墨畫大展」，早前就同時展出水墨畫嘅原作同動畫版，該會主席方黃吉雯（小吉）話，呢種做法可以有效吸引年輕人，事關年輕人喺製作動畫時，需要了解畫家本身嘅構思，所以將水墨畫動畫化絕對有助年輕人認識水墨畫咁話。
小吉仲話，藝術嘅未來發展難以預料，但應該都會係邁向高科技，例如佢冇收藏畫作嘅習慣，其中一個原因係香港寸金尺土，屋企根本冇咁多地方掛畫，冇理由買咗返嚟之後收埋佢，所以如果可以將啲畫作電腦化，入晒落一隻手指（USB）就更方便欣賞。不過佢覺得最理想都係原作同動畫版並列，咁樣先可以直接比較，效果更佳。
有助推廣傳統市場
如果水墨畫都全面動畫化，咁會唔會令原作嘅價值大打折扣？「全球水墨畫大展」策展人郭浩滿就認為唔會，反而係有助推廣市場，畢竟冇人會願意畀錢買一幅電子畫，但原作、真迹就有，所以新興市場係將傳統水墨畫製作成動畫，同原作嘅買賣係兩個唔同嘅市場。水墨畫家熊海都補充，傳統畫作中嘅筆觸輕重、墨色變化等，喺動畫版中都難以呈現出嚟，所以相信傳統畫作唔會完全被取代。
民政事務局常任秘書長謝凌潔貞、康樂及文化事務署署長李美嫦都有出席，謝凌潔貞話，多年前曾經跟過一啲街坊學書法，可惜好多功夫都畀番晒老師，不過老師當年送畀佢嘅隸書字畫仍保留住，依家仲掛喺辦公室同屋企添！
卓妮