開講有話：「知識改變命運。」照咁睇，香港怕且都難以改變依家嘅衰運咯，事關香港知識競爭力急跌，點止被老對手新加坡拋離九條街，遲早連內地偏遠城市都跑贏香港，真係喊都無謂呀。
所謂知識競爭力，即係指將創新想法轉化做財富嘅能力。《2018亞太知識競爭力指數》排行榜啱啱出爐，新加坡蟬聯冠軍，之不過舊年仲攞第二嘅香港就不進反退，被南韓嘅首爾同日本嘅東京爬過頭，屈居「梗頸四」。今次排名榜再一次證明喺港產官僚無能管治之下，香港競爭力如王小二過年，一年差過一年，再咁落去，跌出十大都指日可待，官老爺究竟知唔知醜㗎？
講真，香港唔夠新加坡、南韓同日本鬥，一啲都唔令人意外，最令人擔心嘅係，遲啲連內地城市都不如。好似西藏、雲南、安徽、河南呢類喺香港人眼中好落後偏僻嘅地方，其實喺經濟活動、知識密集等項目上都已經殺入前十名，相比起港府成日得把口搞創科，又話要將香港建設成智慧城市，但就講咗當做咗，人哋就用實際成績代替口水花。咪畀人批中，旨意呢班葉公好龍嘅港官推動創科，香港遲早連滿布雪山草地嘅西藏都鬥唔過㗎咋。
講起就唏噓咯，香港其實從來不缺科研人才，舊年諾貝爾物理學獎得主嘅研究團隊入面，就有香港人蹤影，而先後獲得諾貝爾物理學獎嘅崔琦同高錕亦係香港製造㗎。至於佔領全球七成無人機市場嘅大疆，其創辦人汪滔曾係本港科大嘅學生，可見香港從來都係藏龍臥虎之地，弊就弊在英雄無用武之地，唔係出國發展，就係返內地創業。早前有調查指八成本港科技人才寧願北上搵食，港府創科政策留唔留得住人才，都唔使問喇。
講真，唔止港官係頭大無腦，腦大生草，本地企業對知識創新都唔夠熱心，有名嘅大企業唔係地產就係金融，想搵間見得吓人嘅科技公司都難吖。普羅大眾亦相當保守，睇吓電子支付搞極唔起，就知港人幾咁落後於形勢。又難怪嘅，連港府戙支旗出嚟搞嘅「轉數快」都漏洞多多，被騙徒利用嚟做「搬錢快」；旅發局美酒佳餚巡禮無人機表演，又疑遭黑客入侵，咁兒戲都得嘅，市民對創科想唔「睇定啲先」都難啦。
一句講晒，香港缺乏知識創新嘅土壤，港府高官固然係淺薄到連八達通都唔識用，一般市民最感興趣嘅亦都係炒樓炒股。如果話廿一世紀嘅競爭係科技實力嘅比併，係知識創造力嘅較量，香港係等同自我放棄，仲邊有未來可言吖。