政情：呻冇時間洗頭 麥美娟成日去恤髮
立法會復會後，唔少議員轉咗Look，喺立法會走廊最常聽到就係議員間互相慰問，唔係話對方瘦咗，就係話對方靚咗。但聽聞工聯會嘅麥美娟（Alice）最近成日去恤髮，做乜突然咁貪靚？必定事有蹊蹺。
被問到做乜成日去恤髮？Alice大笑反問：「點解你會知嘅？」隨即佢就呻依家日日晨咁早起身，有時清晨五點就要去擺街站，邊得閒有時間又洗頭又吹頭吖！所以佢就趁中午有空檔，短訊問髮型師得唔得閒，對方OK就衝去洗頭吹髮，半個鐘就搞掂，佢仲好開心咁話「可以Keep到兩日㗎！」仲覺得好抵。
破千度近視 笑言報工傷
另外，Alice又話最近驗眼發現近視深咗二百度，已經突破一千度，而近來天氣乾燥，對眼乾澀，醫生都要佢戴少啲隱形眼鏡，所以大家呢排就會成日見到佢變番四眼妹嘞！佢仲話入咗立法會先要戴眼鏡，依家愈嚟愈深，講笑可能要報工傷。