政情：轉數快交易漏洞 陳家強：我冇受影響
金融管理局近日推出「轉數快」系統，方便市民過數，點知搞到出晒事，有市民嘅銀行帳號懷疑被盜用。財經事務及庫務局前局長陳家強尋日出席一個活動時，講起自己都係用戶之一，不過就冇受影響，又話如果真係出咗事就改番，一定會改到。
撐出事仍可搞番掂
不過就算爆出有帳號懷疑被盜用嘅事件，似乎都冇影響陳對相關系統嘅信心。佢指，目前問題出於開設電子錢包嘅身份認證呢一環，佢咁啱冇受到呢個問題影響，所以冇事喎。佢仲撐，依家面對嘅問題會搞得掂，強調今次出現保安問題，金管局都非常緊張，如果要推動金融科技發展，係唔可以因為乜都擔心，就乜都唔做。
佢又話，其實好多人都鍾意用「轉數快」，因為貪佢夠方便，唔能夠因為一啲小事，就放棄佢嘅好處咁話。