政情：政總東翼前地圍白板 唔通係防佔領新招？
政府總部東翼前地過去曾發生過佔領事件，幾年後加建永久圍欄，其後喺違法佔領行動後更一度關閉，直至去年年底。今年六月，政總東翼前地內嘅旗杆平台擺滿盆栽，其時已經被質疑係為咗慎防再有遊行人士闖入佔領該處，尋日更圍上白板，唔通係進一步慎防再有佔領事件？
行政署：屬綠化工作
行政署尋日回應查詢指，現正為東翼前地進行第二階段綠化工作，以固定花槽代替花盆，增加土壤，並加設排水管道，從而改善種植環境，達致更佳嘅綠化效果，署方又指，工程期間，會按既定程序處理公眾集會的申請，盡量減少工程對公眾集會嘅影響，而該處嘅升旗儀式會喺工程期間暫停。
咁樣睇嚟，旗杆平台上面嘅花盆，將會轉為固定花槽，上面啲嘢睇怕都好難郁到，相信未來如要再有人想佔領政總東翼前地嘅旗杆平台，就會更有難度嘞。