政情：鐵路小組選主席 易志明坐正即閃 陸頌雄頂檔開會
立法會鐵路事宜小組委員會（鐵路小組）尋日係新一個立法會年度首次開會，並選出正副主席，航運交通界議員易志明當選主席，而副主席就由工聯會陸頌雄出任。點知易志明選完主席冇幾耐，就聲稱自己「有一啲重要事項要離開」閃走，引起泛民起哄批評。今次討論港鐵四線齊冧咁重要嘅會議，就要由副主席陸頌雄頂上主持。唔知易志明有乜事咁重要，要丟呢個燙手山芋畀陸頌雄嘞！
鐵路小組主席一職，上個立法會年度係由實政圓桌嘅田北辰出任，後來傳出建制派內部不滿田北辰做主席嘅表現，要求換人，決定由易志明接任。田北辰就覺得自己都已經做咗兩年主席，加上唔做主席可以入動議，又認為易志明係成熟同均真嘅人選。
出席約20分鐘 稱有事走先
尋日下午開會選主席時，公民黨譚文豪就疑似玩嘢提名田北辰做主席，田北辰就即刻笑話多謝佢一番好意，自己唔接納啦。最終易志明以十四票對四票擊敗范國威，順利當選做主席，而陸頌雄就當選副主席。
點知易志明喺選舉後，交代咗下次會議討論事項，同埋問吓委員希望喺本年度討論嘅事項之後就話要走嘞。多名泛民議員即起哄，有人話唔怪之得呢個會兩點開啦，平時都係兩點半開，批評係「tailor-made時間」。易志明雖然去咗開其他委員會一陣，但直至鐵路小組完會前都冇再返嚟，即係出席會議嘅時間約廿分鐘。
首次會議 傾港鐵四線齊冧
雖然陸頌雄頂上主持會議，表現都不過不失，但講真嗰句，會議時間一早通知咗各議員，今次係本年度第一次會議，仲要傾港鐵四線齊冧呢啲咁重要嘅事，易志明啱啱做咗主席，開會冇幾耐就話要走，真係難免惹人質疑，如果佢有乜嘢重要同緊急嘅事，應該好好解釋清楚嘞，否則隨時會被人以為係偷懶，或者唔敢主持同業界有關嘅敏感內容o架！