中環出更：老公係防火牆 張詩培未遇過電騙
依家電話騙案愈嚟愈猖獗，稍有不慎即中招，損失慘重。尋日喺一個分享會上見到香港九龍潮州公會青年委員會主任張詩培，佢話好彩冇遇過電話騙案，事關老公係佢嘅防火牆喎。
點解咁講呢？原來張詩培同老公係用同一個電話密碼嘅，會互相幫對方聽電話，所以老公幫佢擋咗好多白撞同不明來歷嘅電話。佢仲講笑咁話，有次老公行開咗，於是佢幫手接老公嘅電話，聽到係男聲嚟嘅，但對方聽到接電話嘅係女聲，即時Dead Air咗一陣，原來對方以為佢係二奶，真係唔知就嚇死，知道就笑死。佢又話最重要係兩夫妻互相信任，所以互相接對方電話都冇所謂。
講番呢個分享會嘅主題係「自強不息」，仁愛堂主席羅台秦同前主席陳鄭玉而都有嚟撐場。陳鄭玉而亦收過可疑電話，話嗰啲電話唔知喺乜嘢渠道攞到啲個人資料，跟住又話要核對戶口號碼等等，每當聽到內容可能有問題，佢就即刻Cut線，唔會畀機會啲騙徒。
蔡若蓮愛讀書 孭住仔上堂
教育局副局長蔡若蓮喺分享會上話，依家小朋友將平板電腦當係奶嘴，咁唔係辦法，所以政府亦耗用好多資源喺教育嘅範疇上，希望幫到小朋友。佢又講起，自己好鍾意讀書，結婚生仔後仍然有讀書，仲曾經孭住大仔去上堂，每日入屋前就要編排好返去做乜嘢，以便更好咁分配時間。
講到拚搏，香港潮州社團總會副主席兼婦女委員會主席潘陳愛菁亦都有一番經歷。佢話自己由二十三歲開始做紡織業嘅生意，當時返內地做嘢好慘，一來年輕，二來內地嘅女性地位又低，所以喺做生意嘅過程中學識要「硬淨」。至於有冇曾經被騙，佢話生意上唔多唔少都會有，但最緊要係小心啲。
卓妮