今時今日邊個行業最興旺？之唔係排隊黨囉。演唱會賣飛見到佢哋，體育場地申請「場紙」又見到佢哋，就連運輸署轄下停車場月租車位都吸引佢哋排埋一份。特衰政府明知銷售安排漏洞多多都話之你，排隊黨賺到笑，車主就苦過弟弟，有冇再離譜啲吖。
嗱，本報記者走訪油麻地、黃大仙雙鳳街同荃灣等運輸署轄下停車場，發現每逢月租車位月票開賣日子，就有唔少南亞人、長者同大媽晨早霸位，收取五百至六百蚊代為排隊，只要交低支票，完事後就會將月票同泊車卡交到車主手上，仲講明「不成功不收費」，直情攞正牌咁款，無本生利。
有車主不甘被排隊黨撳住搶，提早六粒半鐘排隊，點知一樣冇用，二百多個車位剩番八個未有人登記，人龍一半都係排隊黨。仲有呀，排隊黨不時為爭生意打尖甚至同人郁手郁腳，車主捱眼瞓排通宵已經夠慘，仲要同班瘟神霎氣，你話係咪慘過打仗吖。
不過你咪理，運輸署對於排隊黨搞寸Party，唔止冇諗方法杜絕，仲例牌耍官腔，一味話會密切監察情況，呢啲咪叫你急佢唔急囉。基層市民同職業司機忙住開工搵食，瞓都唔夠瞓，仲要花心機同排隊黨爭位，怎一個慘字了得。
講到尾，政府停車場之所以爭崩頭，除咗收費較私人停車場便宜，最主要原因係公共泊位不足。港府近年唔止減少街邊咪錶位，仲不停拆卸政府停車場，好似尖沙咀中間道停車場停用後，油麻地停車場爆上加爆。所以話，港府嘅城市規劃天殘地缺，人口增加、住宅增加、汽車數量增加，偏偏泊位不增反減，最後咪益咗私人停車場坐地起價囉，話香港冇官商勾結，搵鬼信咯。
講起就心噏，香港百物騰貴，市民生活已經夠晒艱難，家陣連泊車都要同排隊黨爭埋一份，點夠佢哋玩吖。呢，香港早排至發生市民排隊買演唱會飛被斬事件，邊個敢保證政府車位唔會招來黑幫垂涎呢？官老爺明知排隊黨擾民依然唔諗辦法解決，就連以抽籤形式發售月票、網上預先登記一類較公平嘅做法都懶得做，簡直豈有此理。唔通港府嫌南亞幫成為財政包袱及治安毒瘤都未夠，仲想為佢哋製造就業機會？否則點解釋運輸署呢種玩殘車主、明益排隊黨嘅笨拙安排呢？
冇計嘞，堅離地高官冇心冇肺冇靈魂，根本不知民間疾苦，上至風災善後倒瀉籮蟹，下至買演唱會飛及租車位都要市民排餐死，冇一瓣係急市民所急，想市民所想。難怪有人問，市民年年準時交稅到底有乜意義！