政情：葉建源撐單車手參選議員
政治同體育好難溝得埋，教育界立法會議員葉建源就成功將兩件事拉埋一齊。葉早幾日就同訪港嘅德國國會議員Jens Lehmann會面，西裝骨骨嘅Jens Lehmann曾經係一名單車選手，難怪葉反問「香港車神」黃金寶同「牛下女車神」李慧詩想唔想成為立法會議員喇，仲話任何人只要關心社會，都值得鼓勵參選。
葉建源喺Facebook上載咗同Jens Lehmann握手合照，葉話對方係一位鼎鼎大名嘅單車選手，喺九十年代曾經得過六次世界冠軍，係兩面奧運金牌得主。葉接受訪問時又指，對方並非由單車選手一下跳到國會，而係先從地區議會開始從政，但礙於對方只能用德文溝通，故只能約略互相了解。
外國有先例「並無不可」
被問到運動員係咪適合從政，葉以香港為例，立法會議員本身來自各行各業，故運動員出身並無不可，更有熟悉體育業界嘅優勢，又話外國更有演員擔任總統嘅先例，所以無論出身係點都有從政嘅可能。不過，葉就提醒有意做議員嘅人，唔能夠只集中單一範疇，必須多留意社會其他事物喎。