政情：區議員4年得10萬津貼

每名區議員喺每屆、即四年任期內可向政府申領十萬元津貼，用作開設或者搬遷議員辦事處，聽落都覺得唔係好多。不過有區議員就用近九千元津貼嚟買最新、最潮、最貴嘅智能手機，甚至有議員連手機爆屏幕都用公帑找數，咁樣做算唔算係濫用公帑呢？

根據區議會有關議員開支嘅申報資料，油尖旺區議員余德寶喺今年一月買咗一部智能手機，盛惠八千五百八十八元。

佢喺申報資料時就列明，因辦事處冇買任何相機或攝錄器材，所以買部智能手機用作聯絡同拍攝。不過，依家好多智能手機都有呢啲功能，係唔係一定要買一部近九千元嘅就真係見仁見智喇。

另外，九龍城區議會副主席左滙雄似乎亦都鍾情貴價智能手機，佢喺二○一六年五月就率先買入某品牌當時最新款嘅智能手機，花咗近七千七百元，可惜事隔半年部手機就要「入廠」更換液晶體屏幕，於是就要再申領一千三百多元津貼作維修費。