政情：陳百里電子支付 齋用八達通
為方便市民過數，金管局推出「轉數快」系統，但有騙徒借系統漏洞行騙，令人擔心新式系統嘅安全性。尋日中午喺金鐘一間快餐店見到商務及經濟發展局副局長陳百里，佢用自助系統點餐後，付款時毫不猶豫揀咗八達通，冇揀到其他電子錢包付款，唔通佢唔敢用其他支付系統？
稱未適應其他支付工具
事後問陳百里有冇登記選用「轉數快」、支付寶或微信銀包等主流電子錢包，佢就笑笑口話，未全面去用，話要慢慢適應，但承認電子支付比較方便，依家主要都係用八達通。佢又話，尋日朝早去完一個美食節活動，唔少攤檔都接受電子支付，認為可以幫到零售業生意，佢仲介紹當局有啲撥款係幫啲公司更新設備，以使用電子支付添。
商經局作為推動經濟發展嘅政策局，局方又鼓勵企業用電子支付，但係副局長竟然都唔係經常用，仲話要慢慢適應喎，咁邊夠牙力說服人轉用電子支付呢？