政情：投票增侍產假商界議員閃走唔表態

政府增加法定侍產假嘅爭議，主要集中喺增加至五日抑或七日，但焦點以外，商界議員嘅舉動都值得留意。翻查立法會網頁紀錄，當日就侍產假一共有三個修正案，其中Jeffrey、波哥同肥老闆都一齊支持政府嘅修正案，反對民主派嘅修訂，但喺一個鐘之後就主體法案投票時，三人就不約而同「失蹤」冇投票。至於地產及建造界石禮謙同工業界（第二）吳永嘉（Jimmy）更由修正案投票階段已經「失蹤」。

從另一個角度睇，本港傳統四大商會喺立法會都各有代表議員，其中身兼行政會議成員、代表總商會嘅Jeffrey，以及代表中華廠商聯合會嘅Jimmy缺席今次投票，至於工業總會嘅工業界（第一）梁君彥擔任立法會主席而毋須投票表態，只有同樣身兼行會、代表中華總商會嘅商界（第二）廖長江坐定喺位投贊成票。

吳永嘉稱缺席因到北京開會

議員投票時玩「失蹤」嘅情況並唔罕見，目的通常係避開就敏感議題留低投票紀錄，以免日後被選民或選舉對手抽秤攻擊。而今次五個商界議員咁樣閃咗去，唔通佢哋驚支持增加侍產假會得失所屬界別？波哥接受查詢時否認係專登閃走，佢話投完修正案之後，佢問過建制派盟友知道「數夠票」，所以先提前離開，重申佢同保險業界都支持侍產假增加到五日，「老公唔會貪多兩日假就去造人嘛」。至於Jimmy就話當日一早已經飛咗上北京開會，所以先投唔到票，同樣話支持現行方案。

不過，無論口講幾支持都好，呢五名商界議員喺立法會白紙黑字嘅紀錄上，對侍產假增加到五日嘅取態，只係喺自己名字旁邊留下一個空格；又或者將來議會可能進化到唔使投票，口講支持或反對就當作實喇。