中環出更：譚定邦練拳細佬變沙包
中國功夫博大精深，聞名天下，唔少外國人都會慕名而學，但又有幾多人捱得過練功之苦呢？香港中華傳統文化藝術基金會創會主席譚定邦，開辦武館近廿年，日前同弟弟譚定基出席香港文化節非物質文化遺產市集開幕禮，驟眼睇兩人長相十分似，但原來年紀相隔超過六年，譚定邦更大爆小時候練拳，細佬會變做人肉沙包，一拳就被打飛。
譚笑言，爸爸一直有教拳，好細個就要兩兄弟練功，而以前必須要練好拳先可以舞獅，細個唔明點解，只知舞獅有利是收，唔想練功咁辛苦，但練唔好就冇飯食。咁細佬介唔介意變沙包？譚定基就話無所謂，都係大家練功啫，冇被打到重傷。
咁後生仔係咪好難教？譚定邦直言「冇得逼」，冇任何人可以逼人學拳，但好多徒弟入館後，學識尊師重道，明白做人道理。佢又話，試過有徒弟父母上館時，睇到個仔喺度掃地覺得好不可思議，其實係現代嘅教育同以往不同，思想開放卻冇教尊重，認為應該做多啲德育工作。
黃東明師傅憂功夫失傳
活動當日有唔少師傅表演，希望可以令更多人認識真功夫。客家洪拳黃東明師傅話，年輕時喺內地生活，成日被人恰，所以學拳傍身，慨嘆時下年輕人唔捱得辛苦，加上環境太好，功夫對佢哋冇用，擔心日後會失傳。同場嘅非物質文化遺產地脈協會主席趙式慶，都有學客家功夫，佢話幾忙都會繼續練功。
另外，洪拳女師傅趙華身形細粒，但係耍起拳時卻係勁力十足，絕對比得上其他男師傅。趙師傅教路，女仔學拳咪當自己係女仔，人哋點練就偷吓師，總會發揮到潛能。佢學洪拳四十幾年，近年仲承繼埋師傅趙威嘅武館，真係巾幗不讓鬚眉。
卓妮