千呼萬喚始出來，港珠澳大橋經歷一波三折，聽日終於正式通車。雖然大橋之前經受住超強颱風山竹嘅考驗，但係香港呢邊配套不足，通車後會唔會搞到一鑊粥，連累「國家級基建工程」淪為「國際級笑話」，真係冇人話得埋。
有立法會議員就講得啱嘞，港珠澳大橋開通後，東涌以及青馬大橋嘅汽車流量，將會由依家繁忙時間達八成增加到九成，大塞車在所難免；加上使用大橋嘅車輛當中，好多都係大型貨車，一旦行經青馬大橋時發生意外，後果可大可小。最大鑊嘅仲係，香港口岸人工島通往東涌方向嘅北大嶼山公路段出年上半年至落成，而屯門至赤鱲角北面連接路最快要到二○二○年先通車，擔心喺缺乏分流嘅情況下，車輛將會塞晒喺大嶼山，機場交通雪上加霜。
唔係靠嚇o架！係人都知大嶼山車路本身已經出名狹窄兼夾九曲十三彎，年前港府喺欠缺整體配套嘅情況下，倉卒放寬嶼南自駕遊，結果引發交通大混亂，居民怨聲載道，一度封路抗議，連有限度自駕遊車量都消化唔到，大橋通車後會唔會立立亂，仲使問嘅。
咁點解大橋香港段「萬事未備」，仍然要夾硬「斬件式通車」？鬼咩，港珠澳大橋成個建造過程，珠海同澳門段按部就班，進度理想，唯獨香港呢邊延誤復延誤，拖延復拖延，為免繼續拖後腿累街坊，咪惟有學似抗清英雄袁崇煥咁，「頂硬上」囉！
本來呢，香港口岸如果有足夠車位，方便私家車旅客轉乘其他交通工具，仲可以補分流道路嘅不足，可惜人工島口岸停車場得嗰六百個車位咁大把，仲要係單層建築，簡直吹脹。喂，當局自己都估算，大橋通車初期每日有一萬多架車輛使用，區區六百個位點夠用？就算退一萬步講，車流量未如理想，停車場向高空發展，樓層都可以改作其他用途，點都唔會好似依家咁有地唔善用咁笨啩。
古人教落︰多算勝，少算輸，而況於無算乎。無論係分流道路抑或係停車場，都係最基本嘅配套設施，應該一開頭就規劃妥當，到依家正式通車都未搞掂，港產官僚想唔認食塞米都唔得。不過話時話，港產官僚係有全局觀、前瞻性嘅話，四十幾年前有富商提議興建中港跨境大橋，以當時香港物流業一哥地位，如果港府捉到鹿識得脫角，一早拍板，今日已經完全唔同環境。
一葉落知天下秋，港珠澳大橋香港段好事多磨，足見任何筍嘢落喺班廢官手上，都有本事化神奇為腐朽，港府搞親大型基建都畀市民反對到暈，家陣知點解喇！