今日係立法會議員林健鋒（Jeffrey，右二）嘅六十七歲生日，同往年一樣，佢嘅一班黨友預早同佢慶祝，尋日特登準備一個上面寫住「鋒生水起」嘅生日蛋糕，又大唱生日歌，認真有心。不過今年特別啲，就係多咗佢個仔林凱章（左二）一齊過。當Jeffrey被問到有咩生日願望，立法會主席梁君彥搶答話「快啲娶新抱」，惹來現場一陣笑聲。Jeffrey就話，希望身體健康、家庭幸福，又話家庭幸福已經包括好多嘢喎。
