政情：鄺俊宇考慮轉行寫食評
立法會議員鄺俊宇（Roy）早前出席一個文學活動，寫開愛情小說嘅佢話要諗定下一本作品幾時出，更講到自己有能力吸引朋友去食嘢，可以考慮轉行寫食評喎！
呢個活動係香港文學季啟動禮，今屆以「五味雜陳」作主題，將飲食同文學拉上關係。Roy就認為，味道最能夠留住人心，又可以勾起回憶，所以飲食係一個好嘅寫作題材，更可以作為香港嘅軟實力咁去推廣。佢覺得寫食評唔易，難在要令讀者睇完有感覺，但佢就自認有能力令朋友聽完佢講之後去試食。照咁睇，佢轉行寫食評都冇難度喎！
楊雪盈自認雀仔胃
同場仲有灣仔區議員楊雪盈，佢嘅選區大坑有唔少好嘢食，所以有唔少朋友搵佢推介，點知佢對食物要求唔算高，而且食人情味為主，搞到唔知點介紹囉。佢更形容自己有個雀仔胃，簡單食一餐就好易滿足，所以都係一種幸福喇！